திங்கள், 18 செப்டம்பர், 2017

சேலம் வரலாற்று ஆய்வு மையம் apr 15 part 3

apr 15 part4

apr 15 part 5

Salem Historical Research Center சேலம் வரலாற்று ஆய்வு மையம்

part2 Salem Historical Research Center சேலம் வரலாற்று ஆய்வு மையம்

சனி, 5 ஆகஸ்ட், 2017

ஏற்காடு மாரமங்கலம் பன்றிகுத்திபட்டான் நடுகல் புதிய கற்காலகருவிகள்










ஏற்காடு மாரமங்கலம் காட்டுபன்றி குத்திபட்டான் நடுகல் புதிய கற்கால கருவிகள்



கடந்த சனிக்கிழமை அன்று 29 ஜூலை அன்று கலைச்செல்வன் ஆசிரியர் மற்றும் பெருமாள் ஆசிரியர் இருவரும் ஏற்காடு பகுதியில் தேடலை மேற்கொண்டனர் .மோசமான சாலையிலும் கடுமையாக முயற்சித்து கல்வெட்டுக்களையும் ,ஒரு பன்றிகுத்தி பட்டான் நடுகல்லையும் கண்டறிந்தனர். அடுத்த நாள் ஞாயிற்று கிழமை நம் சேலம் வரலாற்று ஆய்வு மைய குழுவானது விழுப்புரம் வீரராகவன் அய்யாவை அழைத்துக்கொண்டு ஏற்காடு கிளம்பியது.
80% நல்ல சாலை 20% செங்குத்தான மிகச்சரிவான மண்சாலையில் பயணித்தோம். 13 ஆம் நூற்றாண்டு கோயிலில் 4 கல்வெட்டுக்கள் படி எடுத்தோம். கல்வெட்டுடன் கூடிய காட்டுபன்றி குத்தி பட்டான் கல்லில் உள்ள எழுத்துக்களையும் படித்தறிந்தோம்.
Kalai SelvanKaliyappan SrinivasanPerumal Madhu NavinPonnambalam ChidambaramJeevanarayanan SelvakumarPeriyar MannanOotykrishna
ஆகிய சேலம் வரலாற்று ஆய்வு மைய உறுப்பினர்கள் பங்கு கொண்டனர்.
காட்டுப்பன்றி குத்தி பட்டான் கல், மற்றும் புதிய கற்கால கருவிகள் பற்றிய செய்தி இன்றைய தினமணி, காலைக்கதிர்,தினகரன் செய்திதாட்களில் செய்தி வந்துள்ளது .செய்தி வெளியிட்ட செய்தி நிறுவனங்களுக்கும் செய்தியாளர்கள் திரு காலைக்கதிர் தமிழ்செல்வன், தினமணி திரு பெரியார் மன்னன், தினகரன் திரு சேகர் அவர்களுக்கும் சேலம் வரலாற்று ஆய்வு மையம் தன் நன்றியை தெரிவித்துக்கொள்கிறது.
சேலம் வரலாற்று ஆய்வு மையத்தில் உள்ள ஒவ்வொரு உறுப்பினர்களும் ,முகநூல்,வாட்சப்பில் உள்ள சான்றோர்களும் கொடுக்கும் உற்சாகமும் ஆதரவுமே ,கருத்துரைகளுமே எங்களை உத்வேகப்படுத்தி மேலும் தேடலை ஆர்வமுடன் செய்ய தூண்டுகிறது.உங்கள் அனைவருக்கும் நன்றி.
பத்திரிக்கை செய்தி:
ஏற்காடு அருகே 6,000 ஆண்டுகளுக்கு முற்பட்ட புதிய கற்கால கருவிகள் மற்றும் ,கல்வெட்டுடன் கூடிய காட்டுபன்றிகுத்தி பட்டான் நடுகல் கண்டுபிடிப்பு
சேலம் மாவட்டம் ஏற்காடு வட்டம் மாரமங்கலம், கேளையூர் என்ற மலை கிராமங்களில் நூற்றுக்கும் மேற்பட்ட புதிய கற்கால கருவிகளும் நடுகல்லும் கண்டுபிடிக்கப்பட்டுள்ளது.
சேலம் வரலாற்று ஆய்வு மையத்தை சேர்ந்த தொல்லியல் ஆய்வாளர்கள் விழுப்புரம் வீரராகவன், ஆறகழூர் பொன்.வெங்கடேசன், பெருமாள் ,கலைச்செல்வன்,சீனிவாசன்,பொன்னம்பலம்,ஜீவநாராயணன்,பெரியார் மன்னன் ,கிருஷ்ணமூர்த்தி ஆகியோர் அடங்கிய குழு ஏற்காடு அருகே சேர்வராயன் மலைத்தொடரில் உள்ள மாரமங்கலம், வடக்கு மலையான் ,கேளையூர் போன்ற மலைகிராமங்களில் தொல்லியல் ஆய்வை மேற்கொண்டது. அப்போது வடக்குமலையான் கோயிலில் 50க்கும் மேற்பட்ட புதிய கற்கால கருவிகளும்.கேளையூர் கிராமம் பிள்ளையார் கோயிலில் 50க்கும் மேற்பட்ட புதிய கற்கால கருவிகளும்,மாரமங்கலம் கிராமத்தில் கல்வெட்டுடன் கூடிய காட்டுப்பன்றிகுத்தி பட்டான் நடுகல்லும் கண்டறியப்பட்டது.
புதிய கற்கால கருவிகள்
புதிய கற்கால கருவிகள் 6 ஆயிரம் ஆண்டுகள் முதல் 10,000 ஆண்டுகள் வரை பழமை வாய்ந்தவை. புதிய கற்காலத்தில் வாழ்ந்த மனிதர்கள் கரடுமுரடான கற்கருவிகளை செதுக்கியதோடு மட்டுமல்லாது அவற்றை தேவைக்கு ஏற்ப தேய்த்து வழவழப்பாக செய்து கொண்டான். கற்கோடாரிகளும், செதுக்கும் கருவிகளும் நல்ல தோற்றம் உடையவையாகவும் வழவழப்பாகவும் செய்யப்பட்டதுடன் குத்தும் முனையும் கூர்மையாக்கப்பட்டது. கீழ் பகுதி கையில் பிடிக்க ஏதுவாகவும் வெட்டும் முனைகளாகவும் செய்யப்பட்டது. பல்லாயிரம் வருடங்களாக கற்கருவிகள் செய்ய தேர்ச்சி பெற்றதால் புதிய கற்காலத்தில் சிறந்த கருவிகள் செய்ய மனிதன் பழகி கொண்டான். சிறிய உருண்டை வடிவ கற்கள் விலங்குகளை தொலைவில் இருந்து தாக்கவும் கொட்டைகளை உடைக்கவும் பயன்பட்டுள்ளன. பெரிய உருண்டை வடிவ கற்கருவிகள் ஆயுதங்களை வழவழப்பாக்கவும் கூர் தீட்டவும் பயன்பட்டுள்ளன. .பழைய கற்கால கருவிகளை விட புதிய கற்கால கருவிகள் அதிகம் கிடைப்பதால் அந்த காலத்தில் வாழ்ந்த மனிதனின் எண்ணிக்கை அதிகரித்திருப்பதை உணரலாம். புதிய கற்கால மனிதன் வாழ்ந்த காலகட்டத்தில் உணவுப்பயிர்களையும் பயிரிடும் முறையையும் அறிய துவங்கியுள்ளான். ஆடு, மாடுகளை வீட்டு விலங்காக பழக்கியும் பயன் பெற்றதோடு நிரந்தரமாக இருப்பிடங்களையும் அமைத்துக்கொண்டு கிராம வாழ்கைக்கும் அடி கோலியுள்ளான்.இந்த கிராமங்களில் உள்ள இந்த புதிய கற்கால கருவிகள் பல நூற்றாண்டுகளுக்கு முன் இங்குள்ள ஓடைகளிலும், விளை நிலங்களில் உழவு ஓட்டும்போதும் கண்டெடுக்கப்பட்டு இப்போது தெய்வமாக இந்த மக்களால் வழிபாடு செய்யப்படுவதாக கிராம மக்கள் கூறுகிறார்கள்.
காட்டுபன்றிகுத்திபட்டான் நடுகல்
மாரமங்கலம் கிராமத்தில் வாணிக்கொம்பை என்ற இடத்தில் கந்தன் என்பவரின் தோட்டத்தில் 200 ஆண்டுகளுக்கு முற்பட்ட கல்வெட்டுடன் கூடிய காட்டுப்பன்றி குத்திப்பட்டான் நடுகல் ஒன்றும் கண்டறியப்பட்டது.
ஒரு வீரன் நீண்ட ஈட்டியால் ஒரு காட்டுப்பன்றியை குத்தி கொல்வதை போல் சிற்பம் உள்ளது. வீரனின் கொண்டை வலது புறம் சாய்ந்துள்ளது. காதுகளில் பாடகம் என்ற காதணி உள்ளது.மீசை மேல்நோக்கி முறுக்கியபடி காட்டப்பட்டுள்ளது.இடையில் அழகிய முடிச்சுடன் கூடிய இடையாடையும் குறு வாளும் உள்ளது. வீரன் கையில் உள்ள ஈட்டி பெரியதாகவும் கூர்மையாகவும் உள்ளது.இடது காலில் வீரக்கழல் உள்ளது.வலிமையோடு வீரன் குத்திய ஈட்டி காட்டுப்பன்றியின் உச்சந்தலையில் குத்தி கழுத்துக்கு கீழே இறங்கியுள்ளது.வீரனின் வலது பக்கம் துப்பாக்கி ஒன்று காட்டப்பட்டுள்ளது.இந்த வீரனின் வேட்டை நாய் இரண்டும் நடுகல்லில் உள்ளது. ஒரு நாயானது காட்டுப்பன்றியின் மேல் ஏறி நின்று அதன் காதை கடித்து குதறுகிறது. மற்றொரு நாய் பன்றியின் பின் காலை கடித்து தாக்கி வீரனுக்கு வேட்டையில் உதவியதை காட்டும்படி நடுகல் சிற்பம் உள்ளது.
அப்போது விளைநிலங்களில் உள்ள பயிர்களை அழித்த காட்டுப்பன்றியை வேட்டையாட தன் இரு வேட்டை நாயுடன் இந்த வீரன் சென்றுள்ளான். அப்போது நடந்த சண்டையில் அந்த காட்டுப்பன்றியை கொன்று வீரனும் இரு நாய்களும் இறந்து போய் உள்ளனனர். அந்த வீரனுக்காலவும் வேட்டை நாய்களுக்காகவும் எடுக்கப்பட்ட நடுகல் இதுவாகும்.
கல்வெட்டு செய்தி
இந்த நடுகல்லில் 19 வரிகளுடன் கல்வெட்டு செய்தி உள்ளது.
மாரமங்கலம் அண்ணாமலைக்கவுண்டர் என்பவர் இந்த நடுகல்லை செய்து வைத்துள்ளார். வாணிக்கொம்பை என்ற இடத்தில் உள்ள விளைநிலங்களில் பயிர்களை காட்டுப்பன்றிகள் அழித்து நாசம் செய்து வந்துள்ளன. காத்தா கவுண்டன் என்பவரின் மகன் நக்க கவுண்டன் என்பவர் அந்த காட்டுப்பன்றியை கொன்று தானும் இறந்துள்ளார். இவருக்கு வைக்கப்பட்ட வீரக்கல் இதுவாகும்.
இப்பகுதியில் மேலும் ஆய்வுகள் செய்தால் இன்னும் அரிய வரலாற்று தகவல்கள் கிடைக்கலாம் என ஆய்வாளர்கள் கூறினார்கள்.
#சேலம்வரலாற்றுஆய்வுமையம்
#ஆறகழூர்பொன்வெங்கடேசன்

http://timesofindia.indiatimes.com/city/salem/prehistoric-stone-weapons-discovered-near-yercaud/articleshow/59922264.cms

http://www.dinamani.com/tamilnadu/2017/aug/04/6000-%E0%AE%86%E0%AE%A3%E0%AF%8D%E0%AE%9F%E0%AF%81%E0%AE%95%E0%AE%B3%E0%AF%8D-%E0%AE%AA%E0%AE%B4%E0%AE%AE%E0%AF%88%E0%AE%AF%E0%AE%BE%E0%AE%A9-%E0%AE%AA%E0%AF%81%E0%AE%A4%E0%AE%BF%E0%AE%AF-%E0%AE%95%E0%AE%B1%E0%AF%8D%E0%AE%95%E0%AE%BE%E0%AE%B2%E0%AE%95%E0%AF%8D-%E0%AE%95%E0%AE%B0%E0%AF%81%E0%AE%B5%E0%AE%BF%E0%AE%95%E0%AE%B3%E0%AF%8D-%E0%AE%A8%E0%AE%9F%E0%AF%81%E0%AE%95%E0%AE%B2%E0%AF%8D-%E0%AE%95%E0%AE%B2%E0%AF%8D%E0%AE%B5%E0%AF%86%E0%AE%9F%E0%AF%8D%E0%AE%9F%E0%AF%81-%E0%AE%95%E0%AE%A3%E0%AF%8D%E0%AE%9F%E0%AF%86%E0%AE%9F%E0%AF%81%E0%AE%AA%E0%AF%8D%E0%AE%AA%E0%AF%81-2749288.html
http://www.dinamalar.com/news_detail.asp?id=1826483

http://www.dinakaran.com/District_Detail.asp?Nid=748907




வெள்ளி, 21 ஜூலை, 2017

சேலம் வாழப்பாடி பெரியகுட்டி மடுவு நடுகற்கள்

பெரியகுட்டி மடுவு -11ஆம் நூற்றாண்டு சோழர்கால நடுகல் செய்தி.

சுமார் 3 மாதங்களுக்கு முன் சேலம் வரலாற்று ஆய்வு மையத்தை சேர்ந்த பெருமாள் சார் புழுதிக்குட்டை பகுதிக்கு ஆய்வு செய்யலாம் என அழைத்தார். சேலம் வரலாற்று ஆய்வு மையத்தை சேர்ந்த விழுப்புரம் வீரராகவன் அய்யா,ஆறகழூர் பொன்.வெங்கடேசன், சுகவன முருகன் சார்
பெருமாள் சார், கலைச்செல்வன் ஆசிரியர், மருத்துவர் பொன்னம்பலம்,சீனிவாசன், ஜீவநாராயணன், பெரியார் மன்னன், தீபக் ஆதி, வீரமணி வீராசாமி அய்யா ஆகியோர் அடங்கிய குழு புழுதிக்குட்டை பகுதியில் இரண்டு நடுகற்களை ஆய்வு செய்து படி எடுத்தோம்..
மேற்கொண்டு தேடலை தொடர கண்ணில் பட்டவர்களிடம் எல்லாம் இங்கு நடுகல் இருக்கா, கல்வெட்டு இருக்கா என விசாரித்துக்கொண்டே மலை மேல் பைக்கில் ஏறுக்கொண்டே இருந்தோம். நீண்ட விசாரிப்பகளுக்கு பின் பெரிய குட்டி மடுவு என்ற இடத்தில் 2 கல்லு ரொம்ப நாளா நின்னுகிட்டு இருக்கு என தகவல் சொன்னார்..உற்சாகம் பீறிட அந்த இடத்தை நோக்கி எங்களின் பைக் சீறி பாய்ந்து சென்றது..
கிட்ட தட்ட அந்தி சாயும் நேரம் .சூரியன் மெல்ல மறைய துவங்கியிருந்தான் .இருட்டுவதற்க்குள் போகவேண்டுமே என பரபரப்புடன் பயணித்தோம்...அந்த இடத்துக்கு சென்று அங்கும் பலருடன் விசாரித்து ஒரு வழியாய் இடம் இருக்கும் தெரிந்தது. சாலையில் இருந்து ஒரு கிலோமீட்டர் தூரம் நடந்தோம்...வழியில் ஒரு ஓடை அதையும் கடந்து சரிவான பாதையின் மேல் ஏறி சென்றோம்..மூச்சு வாங்கியது....தூரத்தில் 2 நடுகற்கள் தெரிந்தது. களைப்பெல்லாம் பறந்தது. பறந்தோடினோம்...
அங்கு தன் உடலில் 5 அம்புகளை வாங்கிய வீரனும், அருகே மற்றொரு வீரனின் நடுகல்லும் இருந்தது..பரபரவென இயங்கினோம்..மைப்படி எடுத்தோம்..எழுத்துக்கள் மிகுந்து தேய்ந்தும் சிதிலமடைந்தும் இருந்ததாலும் ,இரவாகிவிட்டதாலும் திரும்பி விட்டோம்...பின்னர் 3 மாதங்கள் முயற்சித்தும் எழுத்துக்கள் மோசமாக இருந்ததால் திரும்ப சென்று படிக்கலாம் என முடிவு செய்தோம்
இம்முறை தமிழக தொல்லியல் துறையின் ஓய்வு பெற்ற இணை இயக்குனர் பூங்குன்றன் அய்யா , ஆய்வாளர்கள் மங்கயற்கரசி மேடம், கோவை சுந்தரம் அய்யா ஆகியோர் இணைந்தனர்...அப்போது படித்து அறியப்பட்ட செய்தி இன்றைய
காலைக்கதிர், தினமணி, தினத்தந்தி, தினமலர், நேற்றைய மாலைமுரசு, மாலை மலர் ஆகிய நாளிதழ்களில் செய்தி வந்துள்ளது.
செய்தி வெளியிட்ட செய்தி நிறுவனங்களுக்கும், செய்தியாளர்கள் திரு காலைக்கதிர் தமிழ்செல்வன் சார், தினமணி, மாலைமலர் பெரியார் மன்னன் சார், தினத்தந்தி வேலுமணி சார், தினமலர் ஆத்தூர் கிருஷ்ணன் சார் ஆகியோருக்கு சேலம் வரலாற்று ஆய்வு மையம் தன் நன்றியை தெரிவித்துக்கொள்கிறது.

நடுகல் செய்தி:

900 ஆண்டுகளுக்கு முற்பட்ட இரண்டு சோழர்கால நடுகற்கள் கண்டுபிடிப்பு
சேலம் மாவட்டம் வாழப்பாடி வட்டம் புழுதிக்குட்டை ஊராட்சியில் கல்வராயன் மலையில் உள்ள பெரியகுட்டி மடுவு என்ற கிராமத்தில் 900 ஆண்டுகளுக்கு முற்பட்ட இரண்டு நடுகற்கள் கண்டுபிடிக்கப்பட்டுள்ளது.
சேலம் வரலாற்று ஆய்வுமையத்தை சேர்ந்த தமிழக தொல்லியல் துறையின் ஓய்வு பெற்ற இணை இயக்குனர் பூங்குன்றன், வரலாற்று ஆய்வாளர்கள் , விழுப்புரம் வீரராகவன், ஆறகழூர் பொன்.வெங்கடேசன், பெருமாள், மருத்துவர் பொன்னம்பலம் , மங்கையற்கரசி,கோவை சுந்தரம், கலைச்செல்வன் சுகவனமுருகன், ,சீனிவாசன், ஜீவநாராயணன், பெரியார்மன்னன் ஆகியோர் அடங்கிய குழு பெரியகுட்டிமடுவு பகுதியில் கள ஆய்வை மேற்கொண்டனர். அப்போது ஏரிக்காடு பகுதியில் பொன்னுசாமி என்பவரின் நிலத்தில் 11ஆம் நூற்றாண்டு மற்றும் 12 ஆம் நூற்றாண்டை சேர்ந்த இரண்டு சோழர்கால நடுகற்கள் கண்டறியப்பட்டன. 11 ஆம் நூற்றாண்டை சேர்ந்த நடுகல்லில் எழுத்துக்கள் உள்ளன. 12 ஆம் நூற்றாண்டை சேர்ந்த நடுகல்லில் 
எழுத்துக்கள் காணப்படவில்லை.

11ஆம் நூற்றாண்டு நடுகல்

இந்த நடுகல்லானது 2 அடி உயரமும் ஒன்றரை அடி அகலமும் உள்ளது. திரிபங்க நிலையில் சிற்பம் அமைக்கப்பட்டுள்ளது. தலை கொண்டை நேராக உள்ளது. இவன் உடலில் கழுத்து ,மார்பு, வயிறு, தொடை, கணுக்காலுக்கு சற்று மேலே என் 5 இடங்களில் அம்பு பாய்ந்துள்ளதை துல்லியமாக சிற்பத்தில் காட்டியுள்ளனர். இவன் வீரம் மிக்கவனாகவும் முக்கிய தளபதியாகவும் இருந்திருக்கலாம். ஒரே நேரத்தில் பலர் இவனை மையப்படுத்தி சூழ்ந்து தாக்கியதால் பல இடங்களில் அம்பு பாய்ந்துள்ளது. இவன் வலது கையில் வாளும் இடது கையில் வில்லுடன் கூடிய அம்பும் காட்டப்பட்டுள்ளது. அழகான இடை ஆடையும் கழுத்தணியும் காட்டப்பட்டுள்ளது.. இந்த நடுகல்லில் 27 வரிகளில் எழுத்துக்கள் உள்ளன. அதில் 3 வரிகள் படிக்க முடியாதபடி சிதைந்துள்ளன.

கல்வெட்டு சொல்லும் செய்தி

மலையகுல சந்திராதித்த பேரரையன் என்ற தலைவன் காலத்தில் ஒரு வீரன் தன்னுடைய பகுதியை பாதுகாக்க எதிரிகளுடன் போரிட்டு இறந்த செய்தியை இந்த கல்வெட்டு கூறுகிறது. இதில் வரும் மலையகுலம் என்பது சங்க காலம் முதலே திருக்கோயிலூரை தலைநகராக கொண்டு ஆண்ட மலையமான்களை குறிப்பதாகும். சோழர்கள் காலத்தில் இவர்கள் மலையகுல ராயர்கள் என்று அழைக்கப்பட்டனர். இக்கல்வெட்டில் வரும் சந்திராதித்த பேரரையன் என்ற சொல் மிக முக்கியமான ஒன்றாகும். இந்தியாவில் குறிப்பாக தமிழகத்தில் சூரிய குலம், சந்திர குலம் என்ற இரண்டு பிரிவு அரசர்கள் இருந்தார்கள். சில ஊர் கல்வெட்டுக்களில் மட்டுமே இந்த சந்திரகுலம் என்ற பெயர் வருகிறது. இக்கல்வெட்டில் வரும் சந்திராதித்த பேரரையன் என்பது சூரிய குலத்தையும், சந்திர குலத்தையும் இணைத்து ஒரு புதிய குலமாக உருவாகி இருக்கலாம். அதற்கு சான்றான இந்த கல்வெட்டு தமிழக வரலாற்றுக்கு முக்கியமான ஒன்றாகும்.
இந்த கல்வெட்டில் ஈச்சம்பாடி, பரித்தியூர் என்ற ஊர்களின் பெயர்கள் வருகிறது. இந்த ஊர்கள் இப்போதும் கிருஷ்ணகிரி மாவட்டத்தில் அரூர் வட்டத்தில் இதே பெயரில் வழங்கி வருகின்றன என்பது குறிப்பிடதக்கது. இந்த ஊர்களின் வழியாக மாவூர் என்ற ஊர்வரை சென்று இவர்கள் போரிட்டுள்ளனர். இப்போரில் கணியன் என்பவனின் மகன் சேனான் என்ற வீரன் இறந்துள்ளான். அவனுக்காக எடுக்கப்பட்ட நடுகல்லே இதுவாகும்.
12 ஆம் நூற்றாண்டு நடுகல்
சேனான் என்பவனுக்கு எடுக்கப்பட்ட நடுகல்லுக்கு அருகே மற்றொரு நடுகல்லும் உள்ளது. இது 12 ஆம் நூற்றாண்டை சேர்ந்த சோழர்கால நடுகல்லாகும். இதில் எழுத்துக்கள் ஏதும் காணப்படவில்லை. வீரனின் தலையின் வலது புறம் கொண்டை காட்டப்பட்டுள்ளது. வலது கையில் குறுவாள் உள்ளது. இடது கையில் வில் அம்புடன் இணைந்து உள்ளது. போருக்கு தயாராக செல்லும் நிலையில் வீரன் காட்டப்பட்டுள்ளான். காதணிகளும், இடை ஆடையும் காட்டப்பட்டுள்ளது. இடுப்பில் ஒர் அம்பு பாய்ந்த நிலையில் உள்ளது. இடுப்பின் ஒருபுறம் குறுவாள் காட்டப்பட்டுள்ளது. சமபங்க நிலையில் வீரன் உள்ளான். இப்பகுதியில் நடந்த போரில் இவன் எதிரிகளை கொன்று இவனும் வீர மரணம் அடைந்துள்ளான். இவனுக்காக வைக்கப்பட்ட நடுகல் இதுவாகும்.
இப்பகுதியில் தொடர் ஆய்வுகள் மேற்கொண்டால் இன்னும் பல வரலாற்று செய்திகள் கிடைக்கலாம் என வரலாற்று ஆய்வாளர்கள் தெரிவித்தனர்..
அலைபேசி 9047514844

http://m.dailyhunt.in/news/india/tamil/dinamani-epaper-dinamani/vazhappadi+aruke+900+aandukalukku+murbatta+sozharkala+nadukarkal+selam+mavatta+varalarru+aayvu+maiyak+kuzhu+kandarinthathu-newsid-70626486?ss=wsp&s=a
http://www.dinamani.com/all-editions/edition-dharmapuri/salem/2017/jul/21/%E0%AE%B5%E0%AE%BE%E0%AE%B4%E0%AE%AA%E0%AF%8D%E0%AE%AA%E0%AE%BE%E0%AE%9F%E0%AE%BF-%E0%AE%85%E0%AE%B0%E0%AF%81%E0%AE%95%E0%AF%87-900-%E0%AE%86%E0%AE%A3%E0%AF%8D%E0%AE%9F%E0%AF%81%E0%AE%95%E0%AE%B3%E0%AF%81%E0%AE%95%E0%AF%8D%E0%AE%95%E0%AF%81-%E0%AE%AE%E0%AF%81%E0%AE%B1%E0%AF%8D%E0%AE%AA%E0%AE%9F%E0%AF%8D%E0%AE%9F-%E0%AE%9A%E0%AF%8B%E0%AE%B4%E0%AE%B0%E0%AF%8D%E0%AE%95%E0%AE%BE%E0%AE%B2-%E0%AE%A8%E0%AE%9F%E0%AF%81%E0%AE%95%E0%AE%B1%E0%AF%8D%E0%AE%95%E0%AE%B3%E0%AF%8D-%E0%AE%9A%E0%AF%87%E0%AE%B2%E0%AE%AE%E0%AF%8D-%E0%AE%AE%E0%AE%BE%E0%AE%B5%E0%AE%9F%E0%AF%8D%E0%AE%9F-%E0%AE%B5%E0%AE%B0%E0%AE%B2%E0%AE%BE%E0%AE%B1%E0%AF%8D%E0%AE%B1%E0%AF%81-%E0%AE%86%E0%AE%AF%E0%AF%8D%E0%AE%B5%E0%AF%81-%E0%AE%AE%E0%AF%88%E0%AE%AF%E0%AE%95%E0%AF%8D-%E0%AE%95%E0%AF%81%E0%AE%B4%E0%AF%81-2741584.html


http://www.dinamalar.com/district_detail.asp?id=1816881